पुणे : ‘महाराष्ट्र नवनिर्माण विद्यार्थी सेनेच्या कोथरूड विभागाच्या वतीने आयोजित करण्यात आलेल्या ‘राजसन्मान राज्यस्तरीय आंतरमहाविद्यालयीन एकांकिका’ स्पर्धेची प्राथमिक फेरी शनिवार, दि. २३ व रविवार, दि. २४ नोव्हेंबर रोजी लोकायत सभागृह येथे सकाळी नऊ ते सायंकाळी सात या वेळेत घेण्यात येणार आहे,’ अशी माहिती स्पर्धेचे आयोजक व ‘मनविसे’चे कोथरूड विभाग अध्यक्ष शशांक अमराळे यांनी दिली. मनसेचे सरचिटणीस अॅड. किशोर शिंदे हे या स्पर्धेचे निमंत्रक आहेत.
‘स्पर्धेचे हे तिसरे वर्ष असून, या स्पर्धेत सहभागी होण्यासाठी कोणतेही शुल्क नाही. सहभागी झालेल्या एकांकिकांपैकी सर्वोत्तम एकांकिका अंतिम फेरीसाठी निवडल्या जातील. स्पर्धेची अंतिम फेरी सहा डिसेंबर रोजी यशवंतराव चव्हाण सभागृह येथे होणार असून, विजेत्यांना रोख रक्कम आणि सन्मानचिन्ह देऊन गौरविण्यात येणार आहे. महाविद्यालयीन युवक-युवतींना आपले कलागुण सादर करण्यासाठी व्यासपीठ मिळावे, हा स्पर्धेचा उद्देश आहे,’ असेही अमराळे यांनी नमूद केले.
अधिक माहितीसाठी : ७०२०५ ५१२३५, ७२७६६ ९६७०५